عسلامة ومرحبا بيكم في برنامجكم “خذوا عيني شوفو بيها” 😆

اليوم باش نحكيلكم على مهنة الConsulting اللي ولات أكثر اختصاص تقريبا توة في سوق الشغل خاصة في اوروبا.. شنيه معناها Consulting ؟؟ منين جات وشنيه الحكاية بالضبط ؟؟ في الpost هذا باش نحكي من منطلق شخصي بالطبيعة 😁

ايا سيدي بن سيدي.. نرجع بيكم لعام 2014.. بعد عامين خدمة عديتهم بعد الLicence في شركة بترولية في تونس.. خرجت باش نعدي ستاج الماستير في باريس وكنت نلوج على خدمة باش كيف نتخرج الأمور تبدى مريقلة وما نبقاش بطال.. كنت نلوج على poste في شركة éditeur logiciels والا banques والا assurances.. كنت نتصور اللي الخدمة متاع الdéveloppement ما تكون كان في شركة من نوع هذا..

شاءت القدرة اني نتعرف على مهندس تونسي يخدم في باريس قلي كان تفهم Java انجم انصبلك CV متاعك في الشركة متاعنا تجي تخدم Consultant Java.. اكيد فرحت برشة بالعرض بالرغم اني ما فهمتش اصلا اش معناها Consultant 😂😂

نوعية الشركات هاذي اسمها التقني هو  Société de Services en Ingénierie Informatique SSII ou SS2I واللي اسمهم توة Entreprise de Services du Numérique ESN ..

أيا مشيت نلوج اش معناها Consulting.. وبالطبيعة وقت كنت نلوج خيال الصور متحركة كان خدام 😂😂😂 كيف قريت اللي كلمة Consulting هي استشارات واللي Consultant هو مستشار بدى يسرح بيا الخيال الخصب متاعي.. نتخيل في روحي راكش في شركة و 6 والا 7 من الناس دايرين بيا ويسألوا فيا “بالله كيفاه نعملو الComposant هذا؟؟” وتخيلت زادة وحدة Blonde تعملي في Massage لظهري وانا نفسر للحرفاء متاعي كيفاه الخدمة تصير 😂😂😂

أيا تصب الCV متاعي وعيطولي في وقت قياسي وعديت des entretiens منها التقني ومنها الRH.. وكيف طلبت منهم انهم يعملولي الIntroduction de salarié étranger وافقوا بسهولة غريبة (بالرغم انه تتكلف حوالي 4000 اورو وشهرين سباحة حرة في الاجراءات الادارية) وحتى الاجراءات عملوها بسرعة قياسية 😅😅

الsouplesse هاذي الكل زادت الشيخة متاع الخيال الخصب وكيما يقول المثل “مشى في بالي قمرة وربيع” 😂😂 أيا منغير ما انطول عليكم.. روحت لتونس ورجعت لباريس باش نبدى نخدم مستشار Java عظيم 😂

اول نهار مشيت للbureau بكري وشايخ نتخيل في روحي باش نبدى نكتب في الCode.. أيا دخلت للbureau مشيت حذى الmanager متاعي باش نحكو عالخدمة وكيفاه تصير الأمور..

 أيا بدينا اللقاء متاعنا.. وهو مايعرف عنو الفرانسيس بكلمة Point.. باش زعمة زعمة موش اجتماع طويل.. فهمت من اللقاء العجيب اللي مهنة الConsulting العجيبة لازمها Client يطلب profil معين والا تجيه الشركة تقترح عليه profil باش يخدملو mission معينة.. الmission هاذي العقد متاعها ما يتجاوزش 3 سنين..  أيا سيدي في الوقت هاذاكا فما Appel d’offres متاع des consultants Java لل Airbus Defence & Space والAlcatel.. قاللي باش نحطو الCV متاعك ووكيف يعيطولك تعدي les entretiens  وكان لاباس تسلك امورك.. بعدها كان تتقبل.. الSSII تبعثك عند الClient وتعمله facturation بالنهار اللي تخدمه عندهم.. هذاكا علاه كيف يبعثه CV يزيدو معا Taux Journalier Moyen او TJM.. ووقتها عرفت اللي عرفي هو commercial وموش manager.. علا خاطر كان juste يبيع في prestation.. لا management ولاهم يحزنون..

أيا كملنا النقطة.. وقاللي باش نوصلك للworkspace اللي هو البلاصة اللي باش نبقى فيها واللي تخيلتها كيما مكاتب الامريكان في الأفلام..

هيا مشينا لصالة كبيرة فيها برشة من ناس راكشين قدام les PCs متاعهم.. الManager متاعي قالي تنجم تبقى هنا واعمل auto formation في برشة حاجات باش تبدى حاظر للentretien الموعود.. طلع الworkspace هو parking كبير متاع مهندسين بطالة يستنوا في رحمة ربي باش تنزل..

البلاصة هاذي ديما كيف نتذكرها تجي في مخي الروضة.. فيها flipper وbillard وpiano وفيها ناس تلعب وناس تقرى وتتعلم.. وفيها حتى salle de sieste تعمل فيها تعسيلة في القايلة.. ايا ركشت كيما عامة الشعب وبديت نتعرف على الاشقاء البطالة..

وليت كل يوم نمشي للopen space وبديت نعمل programme باش نقرى برشة حاجات.. بديت نقرى في الحاجات اللي طالبينهم في les appels d’offre متاع الAirbus Defence & Space والAlcatel 😄

أيا مانطولش عليكم.. عيطولي باش نعمل des entretiens فيهم الاثنين.. les entretiens كانوا عاديين جداا والاختلاف الوحيد هو انه الcommercial كان حاظر وكل شيء يصير قدامه باش يعرف اذا كان ينجم يطلع السوم كان الentretien تعدى باهي والا لا.. هاذاكا علاه بعد ما يوفى الentretien الclient والcommercial يطلبوا منك تستنى البرة باش ما تشوفش بعينك كيفاه وبقداه  الfacturation متاعك..

بديت نخدم في الAirbus Defence & Space.. الاختيار كان عندي.. واللي برشة SSII مايعطوكش الاختيار.. لكن من حسن حظي الSSII اللي كنت فيها كانوا باهين برشة في التعامل مع les consultants متاعهم..

بالنسبة للSSII كاينهم عيلة العروسة.. عطوا بنتهم وميسو على رقادها.. هاوكا de temps en temps يجي الcommercial يطل عليا ويعمل point مع الclient باش يتهنى الmission ماشية بالباهي والا لا..

بالنسبة للclient كاينهم جايهم واحد براني غريب عليهم.. كانوا يتعاملوا بمنطلق نحن وانتم.. نحن اللي هوما les internes متاع الشركة.. وانتم les externes.. وبالتجربة على قد مايكونو الinternes اكثر على قد ما يكون خير..

بعد 6 شهر mission بدى الضرب بين الclient والssii باش يزيدو الtjm متاعهم.. وبالطبيعة الconsultant هو ديما نقطة الضغط.. وهنا اول conflict مع الssii على خاطر خذاو زيادتهم وماعطونيش زيادتي معاهم.. وهنا بدى الضرب والاخذ والرد وتحصلت على زيادتي بكل روح رياضية.. bon موش رياضية برشة.. أما الامور مريقلة.. 😁

ونصيحتي ليك.. مهما كان واحد حب يعملك bras de fer كبش في اختياراتك ومهما كان الثمن دافع على خط السير متاعك مهما كانت الضروف.. مهما كان الطلب متاعك.. زيادة والا mission والا اي حاجة.. دافع واضرب بالبونية.. وكان ترخ مرة طول عمرك تبقى خاسر.. mission ما تعجبكش بدلها وفورا ماتصبرش على المرارة.. الsalaire مهم ياسر ماتنساش après tout انت salarié ماكش متطوع باش ماتخممش في الفلوس.. فما برشة مواقع تعطيك فكرة باهية على معدل les salaires في الposte اللي انت فيه كيما الGlassdoor اللي ننصحكم بيه.. الخدمة لوكان ماتكونش ممتعة يا اما هي موش متاعك يا اما انت خاطيها..

ايا نكمل الحكاية.. كملت عام في الAirbus وبديت نحب نبدل.. حكيت مع الشركة متاعي باش نبدل وكانوا مرحبين بالفكرة.. اكيد client جديد معناها visibilité اكثر للشركة.. وفرص business اكثر..

ومن بعد مشيت للCanal+ وللSociété Générale.. وكنت نحرص اني نبقى حوالي عام في كل mission ما اكثرش.. وهذا لسبب ساهل برشة.. تقنيا.. كيف تعمل عام في projet باش تكون شفت برشة حاجات واذا كان الprojet صغير والا متوسط.. واللي taille متاعه تكون اقل من 2 مليون سطر.. تنجم في عام بسهولة تكون عملت الtour متاعه وخذيت connaissance باهية على الcode وعلى الarchitecture.. الكلام هذا ما ينطبقش على الpartie métier.. اللي ماكانتش تعنيني كيما الtechnique.. وعملا بمقولة “خذ من كل بستان زهرة” وليت كل عام عند client.. من الdefense للmédias للfinances.. برشة صحابي كانوا يقولولي موش باهي اللي تعمل فيه ولازم تبقى stable في بلاصة وحدة.. لكني كبشت في مبدأ العام في كل بلاصة.. قما سبب ثاني خلاني نكبش اني مانطولش في mission هو انه كنت ضد مبدأ هاي بلاصة باهية.. ما تسلمش فيها.. كانت عندي قناعة اللي على قد ما نطلع techniquement على قد ما باش تجي des missions خير.. والدليل انو توجهي ماكانش غالط اول misson في الconsulting عام 2014 كانت client lourd بالswing وbackend بالEJB 3 واخر وحدة كانت microservices وkubernetes والcloud native كان على عجلة 😁

في وسط الconsulting.. كانت عندي رغبة كبيرة انو نفهم هالدومان الغريب اللي سيطر في العالم الكل كيفاه يخدم.. فكنت كل ماتجي فرصة باش نشارك في appel d’offre والا évaluation technique لcandidat مانقولش لا.. بعد عام خدمة.. شديت الrecrutement ووليت نحب نفك بلاصة أكبر.. فحاولت اني انظم أول Conférence للNetBeans بين الSSII والOracle.. وتمت الOrganisation بنجاح.. وتعمل أول NetBeans Day Paris 2015 في الشركة اللي نخدم فيها.. 🥳🤩😍 وتواصلت الcollaboration مع الOracle لين وصل تحط Logo الSSII اللي نخدم فيها على الtshirt officiel متاع الNetBeans 🥳🤩😍

في اخر 2015.. عند الAirbus Defence & Space واجهتني مشاكل technique مع framework Java اسمو Apache Shiro.. كيف مشيت من بعدها لCanal+ حطيتو في مخي قلت لازم نفهمو ونفهم زملائي فيه.. حبيت نكتب tutoriel عليه.. وبديت نخدم على الobjectif هذاكا.. tutoriel باهي يكون مدخل ليا في الcommunity متاع الJava ام الدنيا..

في ال2016.. زدنا عملنا NetBeans Day France وزادت جات الفرصة في NetBeans Day London.. وبدى نسق النشاط التقني يتزايد..

والtutoriel بدى يكبر ولا كتاب.. وكان هو اول كتاب ليا.. واللي اسمه Pairing Apache Shiro and Java EE 7..

في جوان 2016.. خرجت من الCanal+ وشديت الرحال للSociété Générale باش نخوض اصعب تجربة في الcarrière متاعي.. وهي اني نتعدى Technical Leader على Projet كبير في شركة كبيرة..

من مشاكل الConsulting انك في معظم الأحيان تكون وحدك جاي من الSSII على Projet معين.. الحالة هاذي تخلي الخدمة أصعب شوية.. على خاطر مافماش ولد الشركة متاعك اللي باش يعاونك.. حتى زملائك في الprojet اللي جايين من شركات اخرى ديما باش يكون بيناتنا esprit compétitif.. وحتى كيف تستحق ومافماش شكون في الProjet ينجم يعاون les SSII ماعندهمش des centres de compétences فيهم عباد تعاونك.. après tout هوما يحطوا  des ingénieurs في شركات clientes.. وهذا اللي يمثل أكبر اشكال في شركات الSSII بصفة كبيرة..

كانت الexpérience في الsociété générale من أروع les missions اللي عملتها.. فيها برشة مشاكل technique.. برشة مشاكل gestion de projet وخاصة مشاكل مع الاشخاص على خاطر كنت اصغر واحد في العمر وفي نفس الوقت كنت الtechnical leader متاع الprojet.. واكيد موش ساهل انه تفرض des choix على ناس انت اصغر منهم ب15 سنة 😁

في جوان 2017.. ايه نعم.. بعد عام في الsociété générale.. حسيت اللي ماعادش انجم نكمل في الSSII اللي نخدم فيها.. جيت نحسب فيها نلقى اللي الشركة ماهيش ماشية في طريق تحسين les activités متاعها.. على أكثر من 2000 مهندس.. فما كان 10 من ناس actifs والباقي الشركة ماحبت تعمل شيء باش تحركهم والا تحمسهم..

وهنا.. شديت الرحال لثاني شركة SSII خدمت فيها.. وهنا ولا تصنيف الSSII يتقال عليها الاكثرية ESN بعد مجموعة قوانين جديدة خرجت في جويلية 2017.. توة باش نكمل الArticle نحكي فيه ESN على الشركة الثانية..

قبل ما نمشي للESN الجديدة.. كيف عملت معاهم les entretiens.. قلتلهم راني نحب نمشي لبلاصة نتحرك فيها وتتحركوا معايا.. وكان هذا أهم طلب من طلباتي.. مع الطلبات المادية بالطبيعة.. 😁 حكيتلهم زادة على الcycle متاع عام max اللي نحب ديما نعملو..

وهنا فاجئوني بالproposition متاعهم.. اللي هي تعمل consulting multi-clients.. ايه نعم.. حياتي تبدلت من شهر أوت 2017.. بديت نعمل في 3 missions في الجمعة.. معناها 3 مشاريع مختلفة معناها 3 مغامرات مختلفة فرد وقت.. وهنا كان الجو والربوخ بالرسمي.. كنت شايخ وبالجو دايخ.. وهنا كانت الفرصة اني نركز على problématique معينة اللي هي الCloud Native Developement وفعلا بديت نخدم عليهم عند برشة clients.. وهذا اللي عطاني فكرة كتابي الثاني اللي نشرته بعد 15 شهر خدمة في الrythme الجديد.. الكتاب اكيد تعرفوه واسمه Playing with Java Microservices on Kubernetes and OpenShift ..

عام 2019.. كان خامس ليا في الConsulting.. بديت نقلق من هز دبيشاتك وشلك شلك من Client لClient.. بديت نتساءل عالfinalité متاع التبديل من بلاصة لبلاصة.. وخصوصا انه عملت الtour متاع مجموعة باهية من أكبر les clients في الmarché Parisien.. في الوقت هذا بديت مخمم في اني نتعدى من الConsulting ونمشي عند Éditeur والا Cloud Provider.. وهنا نصحني واحد من اصدقائي اني نصب Candidature عند الMicrosoft 🤩

الBagage اللي لميته في سنوات الConsulting هو اللي كان Catalyseur ليا في التسعة entretienet اللي عديتهم باش تقبلت 😁 سواء الTechnique والا الexpérience اللي عملتها في الrecrutement مع شركات الESN اللي تعديت بيهم.. والBagage هذاكا نفسه عاوني برشة في الOracle Groundbreaker Award ..

وبدأ المشوار مع الMicrosoft 🤩 وهنا توفى قصة خمسة سنين Consulting كانت معبية بالتعب والجو والفشل والنجاح..

في الخمسة سنين اللي عديتهم في الConsulting انجم نعمل statistiques صغيرة..

– 2 شركات SSII

– 9 شركات Clients

– أكثر من 20 conférences و workshops

– تكوين أكثر من 500 طالب ومهندس

في وسط هذا الكل انجم نعطيكم اش استخلصت:

– برشة des consultants طيارة techniquement مايعرفوش يعملوا CV ومايعرفوش يبينوا قوتهم في entretien d’embauche..

– برشة des consultants طيارة برشة ومايعرفوش يقيموا الprétentions salariales متاعهم.. في حين انه برشة des sites web كيف الGlassdoor  يعاونوك باش تعرف الposte اللي تخدم فيه قداش الsalaire moyen متاعه..

– برشة des consultants يركشوا لسنوات طويلة في des projets اللي les technologies متاعه obsolètes وولى عليها الدهر.. في حين انه نهاراللي توفى الmission يلقى الConsultant روحه في التسلل.. وترصيله يتقطع في الrécupération باش يكون à jour مع الmarché..

– برشة des consultants ما يحبوش يتبعوا الupstream متاع les technologies ومايحبوش ينشطوا حتى بالحضور في des événements في حين الElixir الوحيد للConsultant هوما les conférences وles workshops..

– الشركات الكبيرة هي clients متاع معظم الESN اللي موجودين في الMarché.. وموش معناها واحد يخدم عند client كبير معناها الstack technique طيارة.. لا موش باللازمة.. فما لتوة Struts في الSociété Générale.. 😁

ملخص القول..

الConsulting هو من أكبر les domaines d’activités الموجودين توة في العالم الكل.. à part الcompétence technique.. لازم برشة صبر وبرشة اصرار..

وsurtout لازمك تسطر الtrajectoire متاعك كل دقيقة وكل درج..

لازم قبل ما تبدى mission جديدة حط من الأول الحاجات اللي تحب تتعلمهم منها..

خليك à jour مع الupstream متاع الmarché IT ورد بالك من الobsolescence..

من أقوى فوائد الconsulting انك باش ادور برشة شركات وباش تقابل برشة عباد.. اغتنم الفرصة وابني réseau كبير اكبر ما يمكن.. الmarché IT على قد ما يبان كبير على قد ماهو صغير.. زميلك اللي تخدم معاه اليوم غدوة ينجم يكون الclient متاعك..

الConsulting يخليك تنجم تخدم على des projets متاع شركات كبارفي وقت وجهد أقل.. اللي ممكن كان تحب تخدم عندهم directement لازمك برشة وقت..

شخصيا.. نشوف اللي الConsulting هو اهم مرحلة في الcarrière متاعي لكن ما تصورتش ومانتصورش اللي ينجم تكون خدمة متاع long terme.. على خاطر حبيت وتمنيت اللي ندخل نخدم في éditeur كبير..

في الاخر.. نحب نركز اللي كلامي الكله مبني على تجربة شخصية.. وأرائي كلها شخصية وتلزمني وحدي..

بالتوفيق للناس الكل..