اليوم باش نكتب post لاول مرة بالدارجة التونسية باش الكلام الكل يكون amical وموش formel.. 😁

الstage وما أدراك من الstage من أكبر المعضلات اللي تقابل أي طالب مهما كان اختصاصو والا diplome متاعو.. قبل كان ماشي في بالي اللي كان الLMD تاعبين باش يلقو stage.. أما كيف دخلت للحياة المهنية، عرفت اللي حتى طلبة الهندسة باش يدبرو stage حالتهم متعبة أصل..

الحالة التعيسة هاذي السبب فيها هو نفس سبب تدني المهن في تونس وهو سبب معروف: المحاباة وهو مايعرف بالدارجة “بالأكتاف”.. اللي عندو شكون في شركة وخاصة في opérateur téléphonique ما يخممش باش يلوج على stage.. جوو باهي من اللول.. لا تخمم ولا تشقى tonton في الtunisiana 😆😆 علاش قلت Tunisiana بالذات؟؟ على خاطر في 2011 تمنيت نعمل فيها stage d’été ومانجمتش حتى نصب demande.. اللي عندو les épaules مرحبا بيه والباقي في الأمان.. الحاصل tgata3t وسهلي ربي في stage في الBFI يعمل 66 كيف والحمد لله..

بعد الارهاب اللي ريتو في البحث على stage d’été خممت باش نمشي نعمل stage البرة.. العالم المتقدم مايعترفش بالأكتاف كيما تونس.. وحتى كان فما محاباة ماهيش باش تكون كيف تونس.. وهذا أكيد جداا..

بديت رحلة البحث في بداية أوت 2011.. بديت نلوج على  stage développement في أي حاجة.. وهاذي من أكبر الأخطاء اللي عملتها.. ضيعت برشة وقت على خاطر ماحطيتش هدف واضح من الأول.. خممت كيف أي واحد يحب يخرج من بالبلاد.. أعطيني نخرج ونخدم بأي  technologie.. حتى كان يعطوني stage assembleur 8086 راني قلت اي..

الstage d’été اللي عملتو في الBFI كان Java.. وفي الISG  أم الدنيا كنت مركز برشة مع الJava.. وكيف صبيت des candidatures صبيت في PHP و ++C .. شيء ما يقابلش بعضو بالطبيعة.. وهذا كان من الأسباب اللي خلتني ماتجينيش des réponses وحتى كان جات réponse تجي négative..

باهية حكايات العروي أما هيا نتعدو en mode guide باش titre الpost يكون حقيقي موش ضربان لغة 😄

1- حدد اختصاصك

هاذي اهم خطوة في الرحلة الكل.. اذا كان تتخيل الي فما شركة باش تجيبك تعمل stage من غير ماتستفاد منك راك غالط.. مافماش حتى شركة تعمل activité ماتربحش منها.. في الbusiness مافماش حاجة اسمها رجلة ولوجه الله.. اي شركة باش تاخذ stagiaire باش تخليه يخدم كيف اي مهندس.. حتى كان باش يكون productif أقل.. أما ديما لازم يكون productif..

أول سؤال لازم تسألو لروحك ولازم يكون فما réponse وحدة وواضحة: انا شنية اختصاصي ؟ شنية الposte اللي يناسب les compétences متاعي ؟؟

اذا كان كلمة compétences فجعاتك.. أكيد راك خايف ومتخيل الي ال stage والا الخدمة هي غول باش ياكلك..

نعرف اللي برشة باش يقولولي مازلنا نقرو ومازال ماعنديش خبرة في حتى شيء.. كيفاه تحبني نقول عندي compétence في حاجة وأنا مازال ماعنديش؟؟

الاجابة ساهلة.. انت عندك برشة des compétences اللي اي فريق عمل يستحقهم.. فما شكون عندو concentration كبيرة.. فما شكون يفهم اي مشكلة فيسع.. فما شكون bon parleur وينجم يوصل الفكرة بسهولة.. فما شكون عندو esprit d’équipe باهي ويعرف كيفاه يتعامل مع الناس..

هذا humainement.. واللي هو مهم برشة.. اللي نفسيتو باهية ينجم ينجح.. واللي قلبو مسود ملود msawed mlawed 😂 ما عندو وين يوصل.. وحتى كان يوصل يولي expert والا manager كبير ديما يبقى مكروه وماهوش ناجح مهنيا..

نجو للنقطة اللي ماتخليكش ادبر stage باهي وماتخليكش ادبر خدمة.. الcompétence technique اللي مدوخة اي recruteur..

كيف كيف.. انتي اختي اللي سألت بكري على “منين نجيبها مازلت نقرى؟” .. وانت زادة يا اللي قلت “تي أنا نلوج على stage باش نتعلم منو” راك غالط يا صاحبي وماكش عارف كيفاه يصير في الMarché IT

مانيش باش نطول عليك.. كيما يكون فيك compétence humaine تبني فيها.. تحاول تكون calme وتكون positif والجو هذاكا الكل.. كشركة، لازم زادة تجيني techniquement حاضر زادة..

 اش معناها حاضرtechniquement ؟؟

ماو حكينا بكري.. الشركة باش ادخلك باش تربح منك.. كان تجيهم ظلمة وماتعرف شيء.. نبشرك اللي حد ما يعطيك فرصة.. على خاطر انت روحك ماعطيتهاش فرصة تفهم وتعلم..

باش تعمل Stage Java لازم يكون عندك مستوى تقني باهي.. لازم تعرف les fondamentaux ومافاها باس زادة حاجات avancés.. الكتب والفيديويات موجودة والخير مكدس.. لازم تقرى وحدك وتجرب وتتعلم وتعمل حتى des projets حطهم في الGithub وحط lien متاعهم في CV متاعك.. وتعلم تعمل évaluation صادقة لأي projet عملتو.. على خاطر كان تنفخ projet صغير قدام expert technique الفكرة اللي تعطي فيها على روحك هي انو انت عينك صغيرة ملاها projet صغير وموش trendy..

على فكرة كلمة projet صغير راو على les technologies اللي فيه موش عدد الأسطرة..

برشة طلبة يقلك مالقيتش وقت باش نتعلم وحدي.. ماعرفتش.. وهاك الجو.. والله نبقى مستغرب.. الكتب موجودة.. اليوتيوب موجود.. les events موجودين وفي تونس توة الحمد لله ولات فما برشة حاجات واحد ينجم يمشيلها.. وحتى اللي ماينجمش يمشي فما برشة des events يصيرو ويتعداو live عالانترنات..

بالنسبة لrythme اللي واحد ينجم يتعلم بيه.. ساعتين كل يوم والله العز.. تروح للدار.. تركح اومورك.. تعطيها من 21:00 لل 23:00 تسكر تيليفونك باش الفايسبوك ما يقصش عليك.. وتعطيها تقرى في كتاب والا اتبع  vidéo واطبق اللي تشوف فيه الكل.. وكان ماكش tepratiki في اللي تقرى فيه.. وراس امك لاك باش تفهم شيء.. تضيع في وقتك..

كان تبع الrythme هذا مدة 3 اشهر.. juste مدة 5 ايام في الجمعة.. تكون عملت بسهولة 120 ساعة programmation 🤩 العز والله يا معلم 😄 صدقني هاذي مدة كافية انك تسلكها في اي entretien متاع stage.. المدة هاذي تكون عملت فيها أقل حاجة زوز projiet باهين تحطهم في Github متاعك ويكونو réference على مجهودك.. بالطبيعة لازم الcontenu اللي تتعلم بيه يكون مشكور ومن المستحسن يكون ناصحك بيه حد professionnel في الاختصاص هذاكا.. ان شاء الله باش نحاول نعمل page de réference صغيرة فيها les ressources الباهين للJava ام الدنيا..

نصيحة اخرى في باب الcompétence technique.. اللي يتعلم لغة برمجة والا technologie معينة.. حاول تخليك up-to-date باللي صاير في الMonde IT.. فما des sites متاع اخبار الIT والProgrammation حاول تطل عليه حتى درجين فالنهار فيه البركة.. مثلا Dzone InfoQ JaxEnter Medium Quora وبرشة ناس عالTwitter تهبط اخبار وdes liens ياسر حلوين وفاهم منفعة.. المتابعة هاذي تخليك تنجم توري اللي انت intéressé بالinformatique ومغروم وموش اتبع فيها ابتلاء من عند ربي.. هكة اللي يعملك في الentretien يحس اللي انت موش مجرد étudiant قرى الprogrammation في الجامعة وفي الدار.. لا هذا candidat يلوج على المعلومة ويحب يكون à jour.. ومافماش خير من هكة.. 🤔 bon فمة خير من هكة.. وهو انك تزيد تتعلم technologie اخرى مع الtechnologie الاساسية اللي مركز معاها.. مثلا مع Java تزيد شوية Javascript والا Base de données.. والا مع الJava تزيد وحيد Docker تولي بالرسمي تعمل 66 كيف..

نصيحة اخرى.. كان مالقيتش منين تبدى اسأل.. لوج.. احكي مع الناس اللي تخدم.. اطلب النصيحة من أي واحد.. المهم انك تتعلم.. رد بالك من اللي يطيحلك الMoral.. الشعب التونسي من أقوى شعوب العالم في تطييح المورال وبالتجربة والله عانيت منو معاناة زرقاء وخضراء زادة..

وبالله.. في كل génération يجيك واحد يحكيلك على حد يعرفو دبر stage في شركة وهو ظلمة والشركة قبلتو وباش تعملو formation كاملة وتتلهى بيه.. والله الكذبة هاذي كل عام تتعاود.. ومافما حتى société تعمل هكة كان جماعة الاكتاف حاشاكم 😁 كي يجيك واحد يقلك هالخرافة بالله اجبد عليه واشفيلي غليلي منو..

نرجعو لموضوعنا.. ايه كي أنا حاضر techniquement اش باش يزيدني الstage ؟؟

سيدي وlalla.. كان بديت تحس روحك معلم وبدى الغرور يعشش فيك.. تذكر اللي الinformatique بحر والعوامة الصحاح اقوى من اللي تتصور.. donc كل ماتحس روحك معلم انعل بليس وبرى زيد اقرى وتعلم.. والنهار اللي باش يفوتك وما تتعلمش فيه ماعادش يتعاود يا خسارة.. من هذا المنطلق.. الstage باش يزيدك كل شيء.. باش تتعلم كل شيء.. كيفاه تخدم.. كيفاه tcodi.. كيفاه تتعامل مع الباهي والخايب.. كيفاه تتجنب شر الخايب.. كيفاه اتولي joueur باهي في فريق تقني.. باش تولي عندك expérience حقيقية وréference تحطها في الCV متاعك.. واول خطوة في الcarrière متاعك..

2- اعمل CV باهي

في المرحلة اللي فاتت صنعنا رواحنا.. توة لازم نبيعوا الprofil اللي صنعناه.. وباش نجمو نبيعوه لازم ندخلو في الMarketing.. وموش الMarketing الكذاب.. هذا Marketing لازم يكون صادق برشة وعالاخر زادة.. باش العواقب ماتكونش كيما يقولوا.. وخيمة..

الCV هوvitrina باش تبيع باها.. على قد ما تكون مزيانة على قد ما البيوع يكون خير.. رد بالك موش الالوان والLayout هوما مقياس الCV.. كان هكاكة راو الملوخية عندها اخيب CV..

باش مانطولش عليكم.. باش تتكتب الCV ننصحك بموقع واحد هو الEuropass

رد بالك من اخطاء الorthographe عندك الGoogle اي كلمة يصلحها.. رد بالك من Espace ناقص والا زايد.. ورد بالك من اسم logicielle والا ماركة والا كلمة هامة تكتبها كلها miniscule.. الحاجات البسيطة هاذي تعمل فرق كبيييييير.. أنا واحد من الناس الاخطاء هاذي تقلي اللي المترشح هو انسان لامبالي 🤪

العام اللي فات عملت vidéo مع صديقي العزيز حسام الدلاعي حكينا فيه أكثر من ساعة كيفاه تعمل CV باهي.. جرايرو والله عمري ماعملت vidéo 😂😂

3- postuli partout

بما أنو فما برشة des sites متاع des offres d’emploi والا يتسمو job boards بالانقليزي يا مرسي.. حضرة سيادتك لازم تصب في الmaximum من les sites.. وفما برشة des sites معروفين باهين كيف Linkedin والMonster .. وبالنسبة لل les stages الsite اللي لقيت فيه stage الlicence وحتى الmaster  هو Aidostage ننصحكم بيه..

كيف تصب موش معناها سلكتها وباش تجيك réponse.. لا موش باللازمة.. برشة شركات يجاوبوك ويقولولك لا وبرشة للأسف يطفوك جملة وتفصيل.. في الحالة هاذي اش نعمل؟ نكبش ونكمل رحلة البحث متاعي ويا جبل مايهمك في ريح..

توصلشي تصب الف demandes في النهار ؟؟ ميسالش مادامك مازلت تتنفس اضرب على الهدف متاعك للأخر..

غلطة شنيعة فضيعة مريعة يعملوها برشة ناس.. يجي باش يبعث candidature لعشرة شركات.. بالبخل والبهامة.. يبعث مايل واحد ويحط الناس الكل destinataire 😂😂 هذا أكبر message يقول فيه راني بخيل ومانحبش التعب.. فاش قام كل واحد نبعثلو mail.. هاو واحد للناس الكل وكان فما شكون يحب على stagiaire بخلي هاني موجود..

الsignature زادة اللي Meilleures salutations مكتوبة فيها en dur زادة راهي موش باهية.. تخيل واحد باخل انو يحييك؟؟ شنية معناها بالله؟؟

mail ال candidature لازم يكون قصير simple و efficace.. وكان تعرف السيد اللي باعثلو تحطلو Dear Sir Touhemi والا Madame 3eljia.. رد بالك تبدى باعث مايل لمرأة وفي الgreetings تبدى كاتب sir/madame ؟؟ كان اسم السيد باين في الadresse mail امشي شوفو في الانترنات وثبت مرأة والا راجل يهيدك..

4- خلي moralek طالع وثقتك في روحك قوية

اللي قال بكري بحث صعيب كالبحث عن ابرة في كومة قش هو انسان مايعرفش اللي البحث على stage اصعب بياسر.. بحث فيه برشة تعب.. برشة تطييح المورال.. برشة انتظار.. برشة أمل وبرشة احباط.. برشة كلام وبرشة وعود وبرشة programmet.. لكن البرشة حاجات الخايبة هاذي هي شر لابد منو.. الشجرة باش تولي كرسي والا طاولة لازمها تتجرح بالمنشار وتخسر برشة من بدنها.. هكاكة الخدمة والحياة المهنية.. لازم التعب والوجيعة باش النجاح يكون عندو طعم حلو..

خلي moralek طالع.. رد بالك يضربك virus اليأس.. رد بالك حد يطيحلك moralek والا يمسلك عزيمتك.. خليك قوي.. الحلم حلمك وانت قاعد تتعب باش تحققو.. donc حتى واحد ماعندو الحق يقرب من طموحك..

كل ماتحس اللي قاعد postuli وحد مايجاوب فيك.. اول حاجة لازمك تشك في الCV.. ممكن تكون عملت غلطة.. ممكن موش détaillé.. ممكن باين متاع زربة وموش مخدوم بالباهي.. كان هذا الكل لاباس.. شوف الmail اللي تpostuli بيه.. ينجم يكون موش باهي.. الcopier coller يبان راهو.. donc مافيها باس كان تبذل شوية جهد وتكتب بيدك خير من template نص الكوكب يستعمل فيها..

5- خليك حاضر نفسانيا

هنا باش نحكو على برشة حاجات اما باختصار..

ديما خليك حاضر.. كيف شركة باش تكلمك على entretien لازم تبدى حاضر وموجود وفي الوقت.. ينجم يكون بالتليفون وينجم يكون Skype.. رد بالك تبداش موجود في الوقت المحدد والا تحل camera في الskype من غير من interlocuteur يقلك.. والا واحد يطلب يشوفك في الكام تقلو لا.. أي واحد باش يخدم معاك من حقو يشوف وجهك عالأقل باش يعمل معاك lien humain..

مانيش نعلم فيك في الetiquette والا جو اللي يجي والا مايجيش.. أما ديما كيف تجي تعمل أي حاجة حط روحك في بلاصة السيد اللي يحكي معاك.. في بلاد اخرى وعقليته موش كيفك.. اختلاف الافكار مرات يكون صعيب وطريقتك في التعامل معاه هي من أروع les signes متاع قوة شخصيتك..

ولا قدر الله بعد ما عملت هذا الكل ومالقيتش stage.. حاول تبدل direction متاعك.. حاول تشوف في بلاصة أخرى.. حاول تشوف في اختصاص اخر.. المهم بالله virus اليأس لا..

في الاخر..

في الأخر كلمة قلتها في الفايسبوك باش نعاودها في الpost هذا..

احلموا.. اخدموا.. تعلموا.. فيدوا غيركم.. ارسموا مستقبلكم بيديكم.. والاهم خليكم مع الناس اللي اطلعلك المورال موش الناس الهدامة.. حياتك تعيشها مرة وحدة.. اضرب عليها بالبونية وصور فيها البسمة بايدك.. بيدك تضوي ثنيتك..

ربي معاكم وبالتوفيق شاء الله..